အိပ်ခ်ျအိုင်ဗီ တိုက်ဖျက်ရေးလုပ်ငန်းများကို ပူးပေါင်းဆောင်ရွက်ရန် အသင့်ရှိကြောင်း မဖြူဖြူသင်းပြော
ဧရာဝတီ | ဇူလိုင် ၃၊ ၂၀၀၇
အန်အယ်လ်ဒီပါတီ၏ ကိုယ်ခံအားကျဆင်းမှုရောဂါ ကာကွယ်တိုက်ဖျက်ရေးလုပ်ငန်းများကို ဦးဆောင် လုပ်ကိုင်နေသည့် မဖြူဖြူသင်း ပြန်လည်လွတ်မြောက်လာပြီးနောက် အိပ်ခ်ျအိုင်ဗီရောဂါ တိုက်ဖျက်ရေး လုပ်ငန်းများကို အာဏာပိုင်အပါအ၀င် မည်သည့်အဖွဲ့အစည်းနှင့်မဆို ပူးပေါင်းဆောင်ရွက်ရန် အသင့်ရှိကြောင်း ဧရာဝတီကို ပြောဆိုလိုက်သည်။
| |
| ဖြူဖြူသင်း |
အိပ်ခ်ျအိုင်ဗီ ရောဂါနှင့်ပတ်သက်၍ မြန်မာပြည်၌ သေဆုံးနှုန်းနှင့် ရောဂါဖြစ်ပွားနှုန်း များပြားနေသည်ကို တွေ့ရကြောင်းနှင့် အာဏာပိုင်တို့တွင် အဓိက တာဝန်ရှိကြောင်း လည်း ပြောသည်။
မဖြူဖြူသင်းသည် ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများ လွတ်မြောက်ရေး လှုပ်ရှားမှုကို ဦးဆောင်ခဲ့သောကြောင့် မေလ ၂၁ ရက်နေ့ ညက အာဏာပိုင်တို့၏ ဖမ်းဆီးခြင်းကိုခံခဲ့ရပြီး ယမန်နေ့ညက ပြန်လည် လွတ်မြောက် ခဲ့သည်။
အာဏာပိုင်တို့က မဖြူဖြူသင်းအား ရန်ကုန်မြို့ရှိ ကျိုက္ကဆံစစ်ကြောရေးစခန်းတွင် ဖမ်းဆီးချုပ်နှောင်ထားခဲ့သည်။ ဖမ်းဆီးချုပ်နှောင်ခြင်းခံထားရစဉ်က အိပ်ခ်ျအိုင်ဗီ လုပ်ငန်းများကိုလည်း စစ်ဆေးမေးမြန်းသည်ဟု မဖြူဖြူသင်းက ပြောသည်။
“ကျမတို့လုပ်နေတဲ့ အိပ်ခ်ျအိုင်ဗီလုပ်ငန်းတွေကို ဘာမှလျှို့ဝှက်ထားစရာ အကြောင်းမရှိဘူး။ အားလုံးလဲ သိပြီးသားပဲ။ သူတို့သာ (အာဏာပိုင်) မသိတာ။ အဲဒါတွေကို သူတို့သိအောင်ရှင်းပြပေးလိုက်တယ်။ အဲဒီ လုပ်ငန်းတွေကိုလဲ တိုးချဲ့လုပ်ဖို့ အစီအစဉ်ရှိတယ်”ဟု မဖြူဖြူသင်းက ပြောသည်။
မဖြူဖြူသင်းသည် သူမအဖမ်းခံရပြီး တလပြည့်သည့်နေ့တွင် ဖမ်းဆီးထားခြင်းနှင့် ပတ်သက်၍ အာဏာပိုင်တို့က ဘာကြောင့်ဖမ်းသည်ကို တစုံတရာပြောဆိုခြင်းမရှိသောကြောင့် ၇ ရက်ကြာအောင် အစာငတ်ခံ ဆန္ဒပြခဲ့သည်ဟုလည်း ပြောသည်။
ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများ လွတ်မြောက်ရေးလှုပ်ရှားမှုကို လုပ်ဆောင်သောကြောင့် အာဏာပိုင် တို့က အန်အယ်လ်ဒီ လူငယ်အဖွဲ့ဝင် မစုစုနွေးနှင့် မဖြူဖြူသင်းအပါအ၀င် ၅၀ ကျော်ကို ဖမ်းဆီးခဲ့ပြီး ယခုအခါ ပြန်လည် လွတ်မြောက်လာပြီဖြစ်ကြောင်း စုံစမ်းသိရှိရသည်။
No comments:
Post a Comment