ပခုက္ကူမှာ ကြိုးတုတ်ခံရသူ ဦးစန္ဒိမာနှင့် အင်တာဗျူး
အေးနိုင် ။ ဒီဗွီဘီ သတင်းထောက်၊ ထိုင်း စက်တင်ဘာ ၁၁။
မှတ်ချက် (၁)
မြန်မာပြည်အရေး အဆက်မပြတ်လိုသူများဖတ်ဖို့။ ပြီးတော့
ရဟန်းသံဃာတွေနဲ့ စကားမပြောတတ်ဘူး ဆိုသူများ ဖတ်ဖို့။
သတင်းထောက်လုပ်ဖို့ စိတ်ကူးယဉ်နေသူများလည်း ဖတ်သင့်ပါတယ်။
အင်တာဗျူးတဲ့သူက ၀ါရင့်သတင်းထောက်ကြီးမဟုတ်ပေမယ့် ပရိသတ်သိချင်တာတွေကို ထွက်လာအောင် မေးထားတာ တွေ့ရမှာပါ။
မှတ်ချက် (၂)
ဒီအင်တာဗျူးကို http://burmese.dvb.no/textonly/ ကနေ ယူတယ်။
အခုလ (၅) ရက်နေ့က ပခုက္ကူမြို့မှာ ဖြစ်ပွားခဲ့တဲ့ သံဃာတော်တွေရဲ့ ဆန္ဒပြပွဲကို စစ်တပ်က ပစ်ခတ်ဖြိုခွင်းခဲ့တဲ့အတွက် သံဃာတော်တချို့ ဖမ်းဆီးရိုက်နှက်ခံရ၊ တချို့ထောင်သွင်း အကျင်းချခံကြရပါတယ်။ ဒါပေမဲ့ စစ်အစိုးရပိုင် မီဒီယာတွေကတော့ ဒီအချက်တွေကို ငြင်းဆိုပြီး ပခုက္ကူမှာ ဘာမှမဖြစ်ပါဘူးလို့ ပြောဆိုနေပါတယ်၊ ဒါကြောင့် (၅) ရက်နေ့က အမှန်တကယ် ဘာတွေဖြစ်ခဲ့သလဲဆိုတာကို သိရှိနိုင်ဖို့အတွက် ဓာတ်တိုင်မှာ ကြိုးချည်ပြီး (၅) မိနစ်ကြာ နေလှန်းခံခဲ့ရတဲ့ အရှင် ဦးစန္ဒိမာကို လျှောက်ထား မေးမြန်း ထားပါတယ်။
တင်ပါ့ ဘုရား၊ ပခုက္ကူအရေးခင်းတုန်းကလေ ဦးပညာစက္ကရဲ့ လျှောက်ထားချက်တွေဟာ မှားယွင်းပါတယ် ဆိုပြီးတော့ အစိုးရပိုင် သတင်းစာတွေက ရေးလို့ ဦးစန္ဒိမာကို ထပ်ခေါ်လိုက်တာပါ ဘုရား။
“သြော် ဟုတ်လား၊ ”
တင်ပါ့ဘုရား၊
ဦးဇင်းကို ဘာမေးစရာရှိလဲ။
ဒီလိုပါ ဦးဇင်းဘုရား၊ အဲဒီနေ့တုန်းကလေ၊ ငါးရက်နေ့တုန်းက ဘယ်လို ဖြစ်ခဲ့တာလဲ ဆိုတာ တပည့်တော်ကို အကျဉ်းချုံးပြီး ပြောပြပါဘုရား။
“အဲဒီနေ့တုန်းက ဦးဇင်းတို့ အနောက်တိုက်ကနေ ကြွလာတယ်လေ၊ အဲဒီကနေ အလယ်တိုက်ရှေ့ကို ရောက်တယ်။ အဲ - အလယ်တိုက်ရှေ့ကို ရောက်တော့ အဲဒီမှာ မေတ္တာပို့ပြီးတော့ ဒီလမ်းအတိုင်း ရှေ့ကို ဆက်ပြီး ကြွလာခဲ့တယ်။ အဲဒီရှေ့ကို ဦးဇင်းတို့ ရောက်တော့ ဦးဇင်းတို့ ကျောင်းဖက်ကို ၀င်လာခဲ့တယ်။ ဦးဇင်းတို့ ကျောင်းကနေ တခါ တောင်ဖက် ထွက်ပြီးတော့ မေတ္တာပို့တယ်ပေါ့။ မေတ္တာပို့ရင်းနဲ့ အရှေ့ကို တခါ ဦးဇင်းတို့ ပြန်ကြွ၊ တောင်ဖက် အဲဒီ ဗိုလ်ချုပ်လမ်းပေါ့နော်၊ အဲဒီဗိုလ်ချုပ်လမ်းကနေ တခါ ရှေ့ဆက်ကြွ၊ အရှေ့ဖက်ရောက်တော့ ဦးဇင်းတို့ တခါ အရှေ့တိုက်ကို တောင်ဖက်က ၀င်တယ်၊ အဲဒီမှာ မေတ္တာပို့တယ်။ တလမ်းလုံးပေါ့ မေတ္တာပို့တာကတော့။ အဲဒီကနေမှ တခါ ဦးဇင်းတို့ အရှေ့တိုက်ကနေ တောင်ဖက်က၀င်၊ မြောက်ဖက်က ထွက်ပြီး ဦးဇင်းတို့ မေတ္တာပို့လာခဲ့တာ။ အဲဒီကနေ ဦးဇင်းတို့ ပေါက်လမ်းဖက်လည်း ရောက်ရော အဲဒီဖက်မှာ သေနတ်တွေ ဖောက်ပြီးတော့ လူစုခွဲခံခဲ့ရတယ်လေ။ အဲဒီကနေမှ ဦးဇင်းတို့လည်း အဖမ်းခံလိုက်ရတယ်။ အဲဒီတော့ ဦးဇင်းတို့ သုံးပါးပေါ့ အဖမ်းခံလိုက်ရတာ။”
ဘယ်သူတွေလဲ ဘုရား။
“ဦးပညာစက္ကရယ်၊ ဦးပညာနန္ဒရယ်။ အဲဒီ အနောက်တိုက်က နှစ်ပါး။ ကျုပ်ကောပေါ့ အဖမ်းခံရတာ။”
ဦးဇင်းဘုရား တပည့်တော် တစ်ခု မရှင်းလို့ ဘုရား။ ဒီ သံဃာ့နာယက ဆရာတော် ဦးတေဇောက ဖမ်းတာ ဦးစန္ဒိမာကို ဖမ်းတာလား၊ ဘယ်သူ့ကို ဖမ်းတာလဲ ဘုရား။
“သူတို့ ဖမ်းတာတော့ ဘယ်သူရယ် ဘယ်ဝါရယ်လို့တော့ မရွေးဘူး၊ ခေါင်းဆောင် ဖမ်းတာပဲ၊ ဖမ်းတာကတော့။ ဒါပေမဲ့လို့ အဲဒီတုန်းက အကုန်လုံး သံဃာတွေကလည်း ဦးတေဇောက အမိန့်ပေးတော့လေ သေနတ်တွေ ပစ်ဖောက်ပြီးတော့ အကုန်လုံး ၀င်ပြီးတော့ ဆွဲတာကိုး၊ အဲဒီမှာ ပြေးရင်းလွှားရင်းနဲ့ အကုန်လုံး ပြေးကြတာပေါ့၊ ဦးဇင်းတို့လည်း ပြေးတော့ ပြေးပါသေးတယ်။ ဒါပေမဲ့လည်း ဒီလောက် ရဟန်းတော် တစ်ပါး အနေနဲ့ ဒီလောက်ကြီးပြေးတာ မသင့်လျော်ဘူး ဆိုပြီး အေးအေး ဆေးဆေးနဲ့ အဲဒီ အခန်းလေး တစ်ခန်းထဲကို ၀င်ခဲ့တယ်။ အဲဒီမှာ သံဃာတွေလည်း ပြည့်လို့။ ဦးဇင်းလည်း သံဃာတွေကိုငဲ့သော အားဖြင့်ပေါ့၊ အပြင်ဖက် ထွက်ပြီးတော့ ဦးဇင်း အေးအေး ဆေးဆေး အဖမ်းခံလိုက်ပါတယ်၊”
ဘယ်သူက ဖမ်းတာလဲ ဘုရား၊ တပည့်တော်ကို ရှင်းပြပါလားဘုရား။
“အဲဒါတော့ ဦးဇင်းလည်း သူတို့ကို သေသေချာချာ ဂရုမစိုက်မိတော့ ပြောလို့ မရဘူးပေါ့ ဒကာကြီးရာ။ သူတို့ အဖွဲ့ကလည်း အများကြီးကိုး။”
တင်ပါ့ ဘုရား အဲဒီမှာ သေနတ်က ဘယ်နှစ်ချက်လောက် ဖောက်လဲ ဘုရား။
“သေနတ် ဖောက်တာတော့ များတယ် ဒကာကြီးရ။ ဦးဇင်းတို့ ဟို သေသေချာချာလည်း ရေမထားတော့လေ၊ အတိအကျတော့ ပြောလို့ မရဘူးပေါ့ ဒကာကြီးရာ။”
ဒီလိုပါဘုရား သတင်းစာတွေမှာ ရေးတာက သုံးချက်လို့ ပြောလို့ပါဘုရား။
“သုံးချက်တော့ ဘယ်ကမလဲ ဒကာကြီးရာ၊ သုံးချက်တော့ မကဘူး ဒကာကြီး။”
ဦးဇင်းတို့ကို ဖမ်းတယ်ဆိုတာ ဓာတ်တိုင် ကြိုးချည်တယ်ဆိုတာ ဟုတ်လားဘုရား။ ကြိုးနဲ့ တုပ်တယ်ဆိုတာ ဟုတ်လားဘုရား၊ အဲဒါရှင်းပြပေးပါ ဘုရား။
“ဟုတ်တာပေါ့ ဒကာကြီးရာ။ ကြိုးနဲ့ ချည်ဖမ်းတာပေါ့၊ အဲဒီ အနောက်တိုက်က နှစ်ပါးကို ကြိုးကွင်းပစ်တယ်လို့ ပြောတယ်လေ၊ ဦးဇင်းကတော့ အေးအေးဆေးဆေး အဖမ်းခံလိုက်တော့ လက်ကို ထိုးပေးလိုက်တော့ တိရိစ္ဆာန်
တစ်ကောင် တုပ်သလို တုပ်တာပေါ့၊ ဦးဇင်းကို လက်ကိုလေ။ နှစ်ချောင်းစလုံးလေ၊ ရှေ့ထိုးပြီးတော့။ အဲဒီကနေမှ ဦးဇင်းကို ပါးရိုက်တယ်၊ ဆက်ရိုက်။ နောက်ပြီးတော့ ခေါင်းကို သေနတ်ဒင်နဲ့ အဆောင့် ခံလိုက်ရသေးတယ်။ အဲဒီကနေမှာ သူတို့ တခါ ဓာတ်တိုင်ကို နေပူ လှမ်းဖို့ ရှိသေးတယ်၊ အဲဒီမှာလဲ ငါးမိနှစ် ခန့်တော့ ကြာမှာပေါ့ ဒကာကြီးရာ။”
ဦးဇင်းဘုရား သက်တော် ဘယ်လောက်ရှိပြီလဲ ဘုရား၊ တပည့်တော်ကို ပြောပြပေးပါလား။
“ဦးဇင်းအသက်တော်က (၂၉) ထဲကို ရောက်နေပြီ။”
ဦးဇင်းဘုရား အဲဒီမှာ ဓာတ်တိုင်မှာ ဦးဇင်းကိုယ်တိုင် အချည်ခံရတာလားဘုရား၊ အဲဒါကို ရှင်းပြပေးပါလားဘုရား။
“ဟုတ်တယ် ဒကာကြီး ကျုပ်ကိုယ်တိုင် အချည်ခံရတာ၊ အဲဒီ ဓာတ်တိုင်ချည် နောက်ပြီးတော့ အချုပ်ကားပေါ် တင်ပေါ့။ အချုပ်ကားပေါ် တင်ပြီးတော့ အချုပ်ခန်းကိုခေါ်။ အချုပ်ခန်းကိုရောက်တော့ ဦးဇင်းတို့ကို အချုပ်ခန်းထဲကို ၀င်ပို့ပြီးတော့ ပုဆိုး လှဲခိုင်းသေးတယ်၊ ဒါပေမဲ့ ဦးဇင်းတို့လည်း သူတို့ လုပ်ချင်တာ လုပ်ပါစေဆိုပြီးတော့ သင်္ကန်းလှဲခိုင်းလို့ သူတို့ပေးတဲ့ ပုဆိုးယူပြီးတော့ အခန်းထဲမှာ အချုပ်ခန်းထဲမှာပေါ့၊ ဆယ်မိနစ်ခန့်တော့ ကြာမယ်ထင်တယ်၊ အဲဒီကနေမှ တစ်ခါ ဦးဇင်းတို့ ပြန်ထွက်၊ ပြန်ထွက်၊ ဆိုပြီးတော့ တခါ ပြန်ပြီးထွက်လာခဲ့တယ်။”
တင်ပါ့ဘုရား၊ ဒီမှာ တစ်ခု ထပ်မေးချင်တာက ဦးဇင်း အခုနက ပြောတဲ့ အထဲမှာ ပါတာက ဓာတ်တိုင်မှာ ကြိုးချည်ပြီးတော့ ရိုက်တယ်ဆိုတာကလည်း ဘယ်သူက ရိုက်တာလဲ ဘုရား။
“အဲဒါ ဦးဇင်းလည်း ပြောလို့တော့ မရဘူးဗျ၊ ဦးဇင်းလည်း သူတို့ကို သေသေချာချာ မသိတော့လေ ဘယ်သူရိုက်တယ်လို့ ဦးဇင်းလည်း မသိဘူး၊ အဲဒါ သူတို့ အဖွဲ့အစည်းတွေ နေမှာပါ။”
ဘယ်နှစ်ချက်လောက် ရိုက်လဲ ဘုရား။
“ဦးဇင်းကိုတော့ ပါးကိုတစ်ချက်၊ ပါးစပ်ကို တစ်ချက်ရိုက်တယ်၊ ခေါင်းကိုလည်း သေနတ်ဒင်နဲ့ အရိုက်ခံလိုက်ရတယ်ပေါ့။ ဦးဇင်းတော့ အဲဒါပဲ ခံလိုက်ရပါတယ်။”
အစိုးရပိုင် သတင်းစာတွေမှာ လေးငါးရက် ဆက်တိုက် ရှိပါပြီဘုရား၊ ပခုက္ကူသံဃာတွေရဲ့ မေတ္တာပို့ ဆန္ဒပြပွဲမှာ ရိုက်နှက်ခြင်း လုံးလုံး မရှိဘူး၊ ပြီးလို့ရှိရင် ဓာတ်တိုင်မှာ ကြိုးနဲ့ တုတ်တယ်ဆိုတာကလဲ မဟုတ်ဘူးလို့ သူတို့ရေးတယ်၊ ပြည်ပ မီဒီယာတွေက ချဲ့ကားပြီးတော့ ရေးတယ်လို့ ပြောတယ်ဆိုတော့ ဦးဇင်းအနေနဲ့ ဘာပြောချင်လဲ ဘုရား၊ တပည့်တော်တို့ လွှင့်တာ မှန်လားဘုရား၊ အဲဒါရှင်းပြပါ၊ အစိုးရပြောတာ မှန်လားဘုရား။
“ခင်ဗျားတို့ ပြောတာ မှန်ပါတယ်၊ ဦးဇင်းတို့ တကယ် လက်တွေ့ခံရတာပါ၊ သူတို့ပြောတာတွေ တခုမှကို မဟုတ်ဘူး၊ ဦးဇင်း အမှန်တိုင်း ပြောတာ၊ ဦးဇင်းက ရဟန်း တပါးပါ၊ ဦးဇင်းက မလိမ်ပါဘူး။”
ဦးဇင်းကို သေနတ်ဒင်နဲ့ ထုတာ စစ်သားပေါ့ဘုရား။
“အဲလိုပဲ ယူဆရမလို ဖြစ်နေတယ်၊ ဦးဇင်းလည်း အဲဒီတုန်းက ဦးဇင်း ဂုတ်ကို နှိမ့်ထားတယ်၊ ဦးဇင်းလည်း ဘယ်သူ ဆောင့်တယ်လို့ မသိရဘူးပေါ့၊ သူတို့ လက်နက်ကိုင်ခွင့်ရှိတဲ့သူပဲ၊ ဆောင့်မှာပါ။”
ဦးဇင်းက သေနတ်မှန်း ဘယ်လိုသိလဲ ဘုရား။
ဦးဇင်းကို ထိပ်ကိုချတာ ဦးဇင်းထိပ်မှာ ဂွရာ၊ ဦးဇင်း ခံလိုက်ရတယ်လေ။ ဂွနဲ့ ဆောင့်တာ ခံလိုက်ရတယ်။ ဒင် သဘောမျိုးကျမှာပေါ့ ဦးဇင်းအမြင်ကတော့။”
ဦးဇင်းအနေနဲ့ အခုလိုမျိုး သံဃာတော် ဖြစ်ရဲ့သားနဲ့ ပြည်သူတွေရဲ့ ရှေ့က မေတ္တာပို့တဲ့ အခါမှာ ကြမ်းကြမ်းတမ်းတမ်းနဲ့ အကိုင်အတွယ် ခံရတဲ့ အပေါ်မှာကိုရော အစိုးရအပေါ်မှာ ဘာပြောချင်လဲ ဘုရား။
“ဦးဇင်း အဲလိုတော့ မပြောလိုပါဘူး၊ ဒါပေမဲ့လို့ မည်သူ မဆို မေတ္တာပွား သင့်တယ်လေ၊ မဟုတ်ဘူးလား၊ မေတ္တာဆိုတာကတော့ အားလုံးထားသင့်တယ်လေ၊ မေတ္တာဆိုတာက အားလုံးထားမှ သင့်လျော်မှာကိုး၊ အသက်ကြီးလည်း အသက်ကြီးတဲ့ အလျောက် မေတ္တာမရှိလို့ရှိရင်တော့ တိရိစ္ဆာန်
တစ်ကောင်လိုပါပဲ၊ မဟုတ်ဘူးလား၊ အမှန်တကယ်က မည်သူ၊ ဘယ်လိုပြောရမလဲ၊ ဦးဇင်းအနေနဲ့ကြီးသူကို ရိုသေ၊ ငယ်သူကို သနား၊ ရွယ်တူကို လေးစားဆိုတဲ့ စကားလေးလိုပေါ့၊ အဲလိုတော့ ဦးဇင်းအနေနဲ့ ဖြစ်စေချင်တာပေါ့ဗျာ၊ မည်သူမဆိုပေါ့ ဟုတ်ဘူးလား။”
အခုလ (၅) ရက်နေ့က ဆန္ဒပြပွဲအတွင်း အာဏာပိုင်တွေရဲ့ ဖမ်းဆီးရိုက်နှက်မှု ခံခဲ့ရသူ ဦးစန္ဒိမာကို လျှောက်ထား မေးမြန်းခဲ့တာ ဖြစ်ပါတယ်။
No comments:
Post a Comment