Irrawaddy ကိုစိုး | စက်တင်ဘာ ၁၆ ၊ ၂၀၀၇
ဧရာဝတီတိုင်း ဟင်္သာတမြို့တွင် သံဃာတော် အပါး ၂၀၀ ခန့် အစာအဆိပ်ဖြစ်သောကြောင့် ဆေးရုံသို့ ပို့ဆောင်၍ ဆေးကုသမှု ခံယူရကြောင်းသိရှိရသည်။
ဝါတွင်း စနေ ဆွမ်းပတ်လောင်းလှူသောအဖွဲ့မှ ဟင်္သာတမြို့ရှိသံဃာတော်များအတွက် လောင်းလှူသော ဆွမ်းဟင်းကို ဘုန်းပေးပြီးနောက် ယခုကဲ့သို့ သံဃာတော်များ အစာအဆိပ်ဖြစ်ရသည်ဟု ဟင်္သာတမြို့ မိုးကောင်း ကျောင်းတိုက်မှ ဦးပဉ္ဖင်းတပါးကပြောသည်။ ဆွမ်းဟင်းမှာ ငါးသလောက်ပေါင်းနှင့် ငါးကြော်နှပ် ဖြစ်ကြောင်း သိရ သည်။
“ဦးပဉ္ဖင်း လည်းဖြစ်တယ်၊ ရင်ဘတ်တောင့်ရုံလောက်ဖြစ်တာ၊ မနေ့က ဖြစ်ဖြစ်ချင်းတော့ စိုးရိမ်ရတဲ့ သံဃာ ၂၄ ပါး ဆေးရုံ ပို့လိုက်ရတယ်၊ မစိုးရိမ်ရတဲ့ ကျန်တဲ့ သံဃာ အပါး ၁၀၀ ကျော်ကိုတော့ ကျောင်းမှာပဲ ဆေးရုံက လာကု ပေးတယ်”ဟု အထက်ပါ ဦးပဉ္ဖင်းက ပြောသည်။
အဆိုပါ မိုးကောင်းကျောင်းတွင် သံဃာအပါး ၅၀၀ ခန့်ရှိပြီး စနေနေ့က ယင်းသံဃာအားလုံးဆွမ်းဘုန်းပေးခြင်းဖြစ် ကြောင်း၊ တခြားသော အမတသာရီကျောင်း၊ ဘုရားကြီးကျောင်း စသည့် ကျောင်းများမှ သံဃာတော်တချို့လည်း အစာအဆိပ်ဖြစ်ပွားကြောင်း မိုးကောင်းကျောင်း ဦးပဉ္ဖင်းကပြောပြသည်။
ယင်းသံဃာတော်များကို လောင်းလှူသော ဆွမ်းဟင်းမှာ ရန်ကုန်မြို့မှ လာရောက်လှူဒါန်းသော ဆွမ်းဟင်းဖြစ်ပြီး ယခုကဲ့သို့ အစာအဆိပ်ဖြစ်ရခြင်းအကြောင်းရင်းကိုမူ အသေအချာမသိရသေးကြောင်း ဒေသခံတဦး ကပြောဆို သည်။
ယနေ့အခြေအနေအရ စိုးရိမ်ရသော သံဃာ ၃ ပါး ခန့် ဆေးရုံတွင် ဆက်လက်၍ ဆေးကုသမှု ခံယူနေရပြီး ကျန်သံဃာများ ဆေးရုံမှပြန်လည်ဆင်းခွင့်ရပြီဖြစ်သည်ဟုလည်း ဆိုသည်။
ဟင်္သာတမြို့တွင် ဗုဒ္ဓဘာသာ ဘုန်းတော်ကြီးကျောင်းပေါင်း ၁၀၀ ကျော်ရှိပြီး စာသင်တိုက်ပေါင်း ၇ တိုက်ခန့် ရှိ၍ သံဃာပေါင်း ၃၀၀၀ ကျော်ရှိသည်ဟု သိရသည်။
မူရင်း
No comments:
Post a Comment