Thursday, July 19, 2007

KIO's proposals in NC

ဧရာဝတီသတင်း
တိုင်းရင်းသား အခွင့်အရေး ကေအိုင်အို တောင်းဆို
ကိုစိုး ဇူလိုင် ၁၉၊ ၂၀၀၇

မြန်မာစစ်အစိုးရက ယခု ပြန်လည်ကျင်းပသည့် နောက်ဆုံးအကြိမ် အမျိုးသားညီလာခံ၌ ရေးဆွဲမည့် အခြေခံ ဥပဒေမူကြမ်း တွင် တိုင်းရင်းသား အခွင့်အရေးဆိုင်ရာနှင့် ပါဝင်ပြင်ဆင်စေလိုသော အချက်များကို ကချင်ပြည် လွတ်လပ်ရေးအဖွဲ့ (ကေအိုင်အို) က သက်ဆိုင်ရာသို့ တင်ပြတောင်းဆိုမည်ဖြစ်ကြောင်း သိရသည်။

ကေအိုင်အို၏ အဓိက တင်ပြချက်များတွင် နိုင်ငံတော်ဖွဲစည်း တည်ဆောက်ပုံ ပြည်ထောင်စုစနစ်၊ အချုပ်အခြာအာဏာ ပိုင်းခြားခွဲဝေခြင်း၊ အုပ်ချုပ်ရေးဆိုင်ရာ အခန်းကဏ္ဍ၊ သမ္မတ၏ လုပ်ပိုင်ခွင့်အာဏာ၊ ပြည်နယ်အစိုးရ အကြီးအကဲ ရွေးချယ်မှု၊ ပြည်နယ်အစိုးရ ဖွဲ့စည်းမှု၊ ပြည်ထောင်စု နယ်မြေသတ်မှတ်ခြင်း၊ ဘာသာ သာသနာ လွတ်လပ်ခွင့်၊ အမျိုးသား လွှတ်တော်၊ စီးပွားရေးကဏ္ဍ၊ နယ်စပ်ဒေသ ဆိုင်ရာ၊ စီမံခန့်ခွဲရေး၊ ကချင်ပြည်နယ်နိမိတ် သတ်မှတ်မှု စသည့် အချက်များ ပါဝင်သည်။

အချက် ၁၉ ချက်ပါဝင်သော အဆိုပါတင်ပြချက်များကို ကေအိုင်အို၏ အင်တာနက် ၀က်ဘ်ဆိုက်တွင် အသေးစိတ် ဖော်ပြထားသည်။

“လူထုက ကျနော်တို့ ညီလာခံမှာ ဘာမှ မပြော၊ မတောင်းဆိုဘူးလို့ ထင်နေတယ်၊ အဲဒါကို စိုးရိမ်လို့ အခုလို ထုတ်ပြန် တာပါ”ဟု ကေအိုင်အို ပြောရေးဆိုခွင့်ရှိသူ ဆွမ်လွတ် ဂွန်မော်က ပြောသည်။
ယခင်က အမျိုးသားညီလာခံအတွင်း ဆွေးနွေး တင်ပြချက်များကို ပြင်ပတွင် ပုံနှိပ်ဖြန့်ဝေခြင်း မပြုလုပ်ရန် စစ်အစိုးရက သတိပေးတားမြစ်ထားပြီး ဖြန့်ဝေခြင်းလည်းမရှိခဲ့ပေ။ ကေအိုင်အို၏ ယခု တင်ပြချက်များသည် ပြင်ပတွင် ပထမဆုံးအကြိမ် ဖြန့်ဝေခြင်းဖြစ်သည်။

ဆွမ်လွတ် ဂွန်မော်က “သူတို့ ပြန်ဆွေးနွေးပေးသည် ဖြစ်စေ၊ မဖြစ်စေ၊ ဒီ ၁၉ ချက်က ညီလာခံအတွက် ကျနော်တို့ ဘာကြိုက်တယ်၊ မကြိုက်ဘူးဆိုတာကို တင်ပြတာပါ”ဟု ဧရာဝတီသို့ ပြောသည်။

ကေအိုင်အို၏ တင်ပြချက်များသည် တိုင်းရင်းသားအားလုံး အရေးကိုရှေးရှုပါက ကောင်းမွန်သည်ဟု မြင်ကြောင်း မွန်ပြည်သစ်ပါတီ ပြောရေးဆိုခွင့် ရှိသူ နိုင်အောင်မငေးက ပြောသည်။
“ဘယ်လိုပဲဖြစ်ဖြစ် ကျနော်တို့ တိုင်းရင်းသားအရေးကို ရှေးရှုပြီးတော့ တင်ပြတယ်ဆိုရင် ကောင်းပါတယ်၊ ကျနော်တို့ လုံးဝ ထောက်ခံပါတယ်၊ ဒီတင်ပြမှု အပေါ်မှာ SPDC က ဘယ်လောက် လက်ခံပေးမလဲဆိုတဲ့ အပေါ်မှာတော့ မူတည်ပါတယ်”ဟု ၎င်းက ပြောဆိုသည်။

ယခုကျင်းပသော အမျိုးသားညီလာခံသည် နောက်ဆုံးအကြိမ်ဖြစ်သည်ဟု စစ်အစိုးရကပြောဆိုသော်လည်း မည်သို့သော အပြောင်းအလဲများ ဖြစ်ပေါ်လာမည်ကို မသိရှိနိုင်ကြောင်းလည်း နိုင်အောင်မငေးက ပြောသည်။
မွန်ပြည်သစ်ပါတီသည် အမျိုးသားညီလာခံသို့ လေ့လာသူအနေနှင့် တက်ရောက်နေသည်မှာ ယခုတကြိမ်နှင့်ဆိုလျှင် သုံးကြိမ်ရှိပြီ ဖြစ်သည်။
ယမန်နေ့က အမျိုးသားညီလာခံဖွင့်ပွဲတွင် ဒု ဗိုလ်ချုပ်ကြီး သိန်းစိန်က ယခင်သဘောတူညီချက်များကို ပြင်ဆင်မှု မပြုလုပ်ရန် သတိပေးပြောကြားထားသည်။

၂၀၀၄ ခုနှစ် မေလတွင် ကျင်းပသော အမျိုးသားညီလာခံ၌ ယခင်ချမှတ်ထားသည့် နိုင်ငံရေးဦးတည်ချက် (၆) ရပ်နှင့် အခြေခံမူ (၁၀၄) ချက်သည် ဒီမိုကရေစီလုပ်ထုံးလုပ်နည်းများနှင့် မကိုက်ညီသဖြင့် ပြန်လည်ဆွေးနွေး တင်ပြခွင့်ရှိရန် အပစ်အခတ်ရပ်စဲထားသော တိုင်းရင်းသား လက်နက်ကိုင်အဖွဲ့ (၁၃) ဖွဲ့က သဘောထား ထုတ်ပြန်ကြေညာပြီး အမျိုးသားညီလာခံ ကျင်းပရေးကော်မရှင်သို့ ပေးပို့တင်ပြခဲ့ဖူးသည်။

စစ်အစိုးရ၏ ယခု ပြန်လည်ကျင်းပသည့် အမျိုးသားညီလာခံတွင် ကိုယ်စားလှယ်ပေါင်း ၁ ထောင်ကျော် တက်ရောက်လျှက် ရှိပြီး အများစုမှာ စစ်အစိုးရက ရွေးချယ်ထားသည့် ကိုယ်စားလှယ်များ ဖြစ်သည်။
၁၉၉၃ ခုနှစ်တွင် ကျင်းပခဲ့သည့် အမျိုးသားညီလာခံမှ စတင်၍ အခြေခံဥပဒေသစ်ကို ရေးဆွဲနေခဲ့ခြင်းဖြစ်ပြီး ယင်း အခြေခံ ဥပဒေကို ရေးဆွဲနေသည်မှာ ပြီးစီးလုနီးပြီဖြစ်ကြောင်း စစ်အစိုးရက ထုတ်ဖော်ပြောကြားထားသည်။

စစ်အစိုးရ၏ အမျိုးသားညီလာခံသည် ဒီမိုကရေစီ နည်းလမ်းမကျဟုဆိုကာ အမျိုးသား ဒီမိုကရေစီအဖွဲ့ချုပ် (အန်အယ်လ်ဒီ) က ကန့်ကွက် သပိတ်မှောက်ခဲ့သည်။

No comments: