(အင်တာဗျူးကတော့ ၂လလောက် ကြာသွားပြီ။ ဖတ်သင့်လို့ တင်ပေးလိုက်ပါတယ်။)
မင်းကိုနိုင်နှင့် စကားပြောခြင်း
ဧရာဝတီ မေ ၂၄၊ ၂၀၀၇
မေး။ ။ အိုးပင်းဟတ် ကန်ပိန်းကြောင့် ရန်ကုန်မှာ လူတွေ မကျေနပ် တာတွေကို ဖော်ထုတ်တင်ပြရဲလာကြတယ်လို့ သုံးသပ်နေကြတယ်။ အိုးပင်းဟတ်ကန်ပိန်းရဲ့ နောက်ဆုံးအနေအထားက ဘယ်လိုရှိသလဲဗျ။
ဖြေ။ ။ ကျနော်တို့ ရည်ရွယ်ကတည်းကိုက ပြည်သူတွေမှာရှိတဲ့ နဂိုမူလအခွင့်အရေးဖြစ်တဲ့ လွပ်လပ်စွာ ဖော်ထုတ်ရေးသားခွင့် ကိုယ့်ရဲ့ သဘောထားတွေကို တင်ပြခွင့်ဆိုတဲ့အတိုင်းကို ကျနော်တို့ကပြောတာ၊ အဲဒီဥစ္စာတွေကို သုံးကြပါဆိုပြီးတော့ ကျနော်တို့က နှိုးဆော်တာ၊ အဲဒီတော့ ရင်ဖွင့်လွှာတွေလုပ်လာတဲ့ နောက်ပိုင်းမှာတော့ ဟုတ်ပါတယ်၊ ပြန်လည်ပြီးတော့ နိုးကြားမှုတွေဖြစ်လာတယ်။
အဲဒီကနေ တဆင့်ပြီးတော့ သဘောထားဆန္ဒတွေ စာရေးပြီးတော့ တင်ပြတာမဟုတ်ဘဲနဲ့ ပုံစံမျိုးစုံနဲ့ ငြိမ်းချမ်းစွာ ဖော်ထုတ်တာတွေ ရှိလာတယ်။ ဒီလိုပဲ တချို့ဆိုလို့ရှိရင် မိမိအိမ်မှာ မိမိ ခြံတံခါးမှာ ကပ်ထားတာမျိုးတွေလည်း ရှိတယ်။ ဒါကတော့ ကျနော်တို့မျိုးစုံ တွေ့နေရတယ်။ နောက်ဆုံးအနေအထားကို ပြောရမယ်ဆိုလို့ရှိရင် တပြည် လုံးက နယ်အနှံ့ တောအနှံ့ တောင်အနှံ့ကရလာတဲ့ စာတွေအပေါ်မှာ မူတည်ပြီးတော့ ပြည်သူလူထုရဲ့ သဘောထားဆန္ဒ အစစ်အမှန်ဟာ ဘာလဲဆိုတာကို ကျနော်တို့ ပုံဖော်လို့ရနေပြီဖြစ်တယ်။
ကျနော်တို့က စနစ်တကျ အမျိုးအစားတွေ ခွဲထုတ်တယ်။ လူမှုရေး၊ ကျန်းမာရေး၊ စီးပွားရေး … သူ့ကဏ္ဍ အလိုက်နဲ့သူ ကျနော်တို့ခွဲကြည့်လိုက်တဲ့အခါမှာ သုတေသနစာတမ်းတစောင်ကို ကျနော်တို့ ပြုစုနိုင်နေပြီ ဖြစ်တယ်။ အဲဒီအပေါ်မှာ ရလာတဲ့အခြေခံကို ကျနော်တို့ တကမ္ဘာလုံးသိအောင် တင်ပြမယ်။ ကျနော်တို့ တိုင်းပြည်ရဲ့အခြေအနေ၊ ကျနော်တို့ တိုင်းပြည်မှာရှိတဲ့ ပြည်သူပြည်သားတွေရဲ့ သဘောထားဆန္ဒ အစစ်အမှန် ဘာဖြစ်တယ်ဆိုတာကို ကျနော်တို့ တင်ပြဖို့ အတွက် အခြေခံကောင်းတခု ရသွားပြီဖြစ်ပါတယ်။
မေး။ ။ ဆိုတော့ အဲလိုမျိုး လူတွေဖွင့်ဟဖော်ထုတ်လာတဲ့အခါကျတော့ စစ်အစိုးရက ဆူပူအုံကြွမယ် စိုးရိမ်ပြီး ခင်ဗျား တို့ကို ဖမ်းခဲ့တယ်၊ နောက်ပြီး ပြန်လွှတ်တယ်။ ဒီလိုမျိုးပဲ ကျန်တဲ့ ဆန္ဒပြတဲ့လူတွေကိုလည်း ဖမ်းလိုက် လွှတ်လိုက်ဆိုတဲ့ ပုံစံမျိုးတွေ ရှိနေတယ်လေ။ ဒါ့အပြင်ကို ဥပဒေမဲ့ လွန်လွန်ကျူးကျူး ကိုင်တွယ်ပြုမူတာတွေ လည်းကြားရတယ်။ နောက်ပြီးတော့ လုံထိန်းတပ်တွေကို ပြင်ဆင်တာတွေလည်း ကြားရတယ်။ ဆိုတော့ကာ နိုင်ငံရေးအငွေ့အသက်က သွေးထွက်သံယိုမှုကို ဦးတည်နေတယ်လို့ ခင်ဗျားတို့အနေနဲ့ ခံစားရလားဗျ။
ဖြေ။ ။ အခြေအနေက ဒီကနေ့ စစ်အစိုးရရော ကျနော်တို့ ဒီမိုကရေစီသမားတွေရော နှစ်ဦးနှစ်ဘက်လုံး အပေါ်မှာ မူတည်နေပါတယ်။ ကျနော်တို့တတွေဟာ ခံစားချက်ကို ဦးစားပေးပြီးတော့ လက်လွတ်စပယ် လုပ်မိ တာမျိုးမဖြစ်ဖို့ကတော့ ပထမပါ။ ကျနော်ဆိုလိုတာက ကျနော်တို့သဘောထားတွေ ဖော်ထုတ်တဲ့နေရာမှာ ရုန်းရင်းဆန်ခတ်ဖြစ်တာမျိုး၊ အကြမ်းဖက် ဆန်တဲ့ ပုံစံမျိုးမဖြစ်အောင် ကျနော်တို့ဘက်က ထိန်းတယ်။ ကျနော်တို့ဘက်က တင်ပြတဲ့ ရိုးရိုးသားသား သဘောထားဆန္ဒ အစစ်အမှန်တွေကို နားထောင်နိုင်တဲ့ နားတွေ လည်း လိုတယ်။
ကျနော်တို့ တင်ပြသမျှ ပြည်သူတွေ ပြောဆိုသမျှအပေါ်မှာ သံသယအမြင်နဲ့ မချဉ်းကပ်ဖို့ အရေးကြီးတယ်။ သဘောကတော့ အာဏာကိုလာပြီးတော့ ထိပါးတော့မလားဟဲ့ဆိုတဲ့ စိုးရိမ်ကြောင့်ကျမှု အခြေခံနဲ့ တုန့်ပြန် မယ်ဆိုရင်တော့ သွေးထွက်သံယို တင်မကဘူး၊ တော်တော်ကို ကြေကွဲစရာတွေ ဖြစ်လာမယ့်အခြေအနေမျိုးတွေ ရောက်သွားမှာပေါ့။ အဲဒီတော့ အဓိက အချက်ဟာ ကျနော်တို့ပြည်သူတွေအနေနဲ့ တကယ်တမ်း ကိုယ့်ဆန္ဒကို ငြိမ်းချမ်းစွာ ဖော်ထုတ်ပါ။ အဲဒီဖော်ထုတ်မှုဟာ အကြမ်းမဖက်ဘဲ ဖြစ်ရပါမယ်။ စည်းကမ်းသေ၀ပ်စွာနဲ့ ဖော်ထုတ် ကြရမယ်။ ရဲရဲရင့်ရင့် ဖော်ထုတ်ရမယ်။
တဘက်က အာဏာပိုင်တွေကလည်း ဒါတွေကို အပြုသဘောနဲ့ နားလည် နိုင်ရမယ်။ ပြီးတော့မှ ဘယ်လိုတွေပြုပြင်နိုင်သလဲဆိုတဲ့ နည်းလမ်းကို ရွေးချယ်ရမှာဖြစ်တယ်။
အဲဒီလိုမဟုတ်ဘဲ လူတွေက သဘောထားတွေဖော်ပြီး ဆန္ဒတွေထုတ်ကြပြီ ဆိုတာနဲ့ကိုတင် အာဏာဆိုတဲ့ အချက် တခုတည်း ကြည့်ပြီးတော့ ဒီကုလားထိုင်ကို လှုပ်မလား၊ ဒီပုလ္လင်ကိုထိပါးလေမလားဆိုတဲ့ အတွေးမျိုးနဲ့ တုန့်ပြန်မယ်ဆိုရင် တော့ အနာဂတ်လည်း မကောင်းဘူး၊ သမိုင်းကြောင်းလည်း မလှဘူးဖြစ်သွားတော့မယ်။ ကျနော်တို့ ဒါကို စိုးရိမ်တယ်။ ဒါကြောင့်မို့ ထပ်ခါတလဲလဲ သတိပေးနေရခြင်းဖြစ်တယ်။
မေး။ ။ ဆိုတော့ အမျိုးသားပြန်လည်ရင်ကြားစေ့ရေးလမ်းက အခုထက်ထိ တံခါးပွင့်နေတုန်းပဲလို့ ခင်ဗျားတို့အနေနဲ့ မြင်လား။
ဖြေ။ ။ ဒီလိုဗျ … သူက တံခါးတချပ်တည်းတော့ မဟုတ်ဘူး။ ကျနော်တို့ဘက်က တချပ်ဖြစ်မယ်၊ လက်ရှိအစိုးရဘက်က တချပ်ရှိမယ်။ ကျနော်တို့ဘက်က တံခါးကိုတော့ ကျနော်တို့က ဖွင့်ထားဆဲပဲ။ ကျနော်တို့က ရှိနေတဲ့ ဖိနှိပ်ခံရမှု၊ မတရားမှု တွေကို တွန်းလှန်ရင်း တဘက်ကလည်း ပြဿနာတိုင်းကို ဖြေရှင်းတဲ့အခါမှာ အမျိုးသားပြန်လည်သင့်မြတ်ရေးဆိုတဲ့ စိတ်နှလုံးအခံနဲ့ပဲ ဖြေရှင်းဆဲပဲ ဖြစ်တဲ့အတွက်ကြောင့် ကျနော်တို့ဘက်ကတံခါးကို ဖွင့်ထားတာ။ တဘက်ကတံခါးပဲ ကျန်နေတာပါ။
အဲဒါကိုလည်း ကျနော်တို့က မှန်ကန်တဲ့ ဖြေရှင်းမှုပုံစံဖြစ်တဲ့ ကိုယ့်အမျိုးသားချင်းပဲဆိုတဲ့ အတွေးနဲ့ပေါ့၊ ဒီဟာတွေကို ချေမှုန်းပစ်မယ်ဆိုတဲ့အစား ဒါ ကိုယ့်ရဲ့အင်အားတွေပဲ၊ ကိုယ့်တိုင်းပြည်တည်ဆောက်ရေးမှာ ပေါင်းရမယ်၊ လက်တွဲရမယ့် အင်အားတွေပါဆိုတဲ့ အသိမျိုးကို ပေးနိုင်ဖို့အတွက် အဲဒီတံခါးကို ဆက်ပြီးတော့ ကျနော်တို့ ခေါက်နေရမှာ ဖြစ်တယ်။
မေး။ ။ လက်ရှိ အနေအထားအရဆိုရင် စစ်အစိုးရအနေနဲ့ သူ့ဟာသူ အမျိုးသားညီလာခံလုပ်ပြီးတော့ လမ်းပြမြေပုံ အဆင့်ဆင့်နဲ့ ဇွတ်သွားမယ်ဆိုတဲ့ အနေအထားဗျာ။ နောက်ပြီးတော့ ဒေါ်အောင်ဆန်းစုကြည်နဲ့ အင်န်အယ်လ်ဒီ မပါဘဲနဲ့ ဆက်သွားမယ်ဆိုလည်း တချို့တွေက လိုက်သွားမယ့်အနေအထားမျိုးတွေ တွေ့နေရတယ်ဆိုတော့ ခင်ဗျားတို့အနေနဲ့ရော ဘယ်လိုမျိုး ရင်ဆိုင်ဖြတ်သန်းဖို့ပြင်ဆင်ထားသလဲခင်ဗျ။
ဖြေ။ ။ ကျနော်တို့က နိုင်ငံရေးပြဿနာကို ဖြေရှင်းတဲ့နေရာမှာ ဒီလိုပုဂ္ဂိုလ်အစွဲ၊ အဖွဲ့အစည်းအစွဲ ဆိုပြီးတော့ စဉ်းစားတဲ့ ပုံစံမျိုး ကျနော်တို့ မချဉ်းကပ်ဘူးခင်ဗျ။ တခုတော့ရှိတာပေါ့၊ ရွေးကောက်ပွဲတခုရဲ့ ဂုဏ်သိက္ခာကို သေးသိမ်အောင် အင်အား သုံးပြီးတော့ ဖန်တီးပြီးတော့မှ အင်အားရှိတဲ့လူက တဖက်သတ် ဖြေရှင်းတာမျိုးကို တော့ ကျနော်တို့လက်ခံလို့မရဘူး။ ဒီမိုကရေစီစနစ်ကို သွားမယ်လို့ပြောထားတယ်။
အဲဒီတော့ ရွေးကောက်ပွဲတခုကို အသိအမှတ်ပြုပြီးတော့ ဖြေရှင်းတဲ့ပုံစံကိုတော့ ကျနော်တို့က တောင်းဆိုရလိမ့်မယ်။ အဲဒီဲလိုမှ မလုပ်ဘူးဆိုရင် နောက်ထပ် ရွေးကောက်ပွဲဆိုတာတွေကို ပြည်သူတွေက ဘယ်လိုယုံကြည်ကြမလဲ။ ဘယ်လိုမှ အာမခံချက်မရှိဘူးဆိုတာကို ဖော်ပြနေတယ်။ ဒါ အရေးကြီးတဲ့ အချက်ပါ။
ကျနော်တို့ဘက်ကတော့ အကြမ်းမဖက် ငြိမ်းချမ်းတဲ့နည်းနဲ့ လူထုတရပ်လုံး ပါဝင်တဲ့နည်းကိုပဲ ရွေးတယ်ဆိုတာ ကျနော်တို့ ဖော်ပြပြီးပါပြီ။ တိုင်းပြည်တခုရဲ့ အနာဂတ်ကို့ အစိုးရကချည်း ရွေးလို့တော့မရဘူးပေါ့ခင်ဗျာ။ နိုင်ငံသားအားလုံးရဲ့ သဘောတူညီမှု ဖြေရှင်းမှုက အရေးအကြီးဆုံးပါပဲ။
မေး။ ။ ဟုတ်ပြီ၊ ခင်ဗျား ခုနကပြောသလိုမျိုး နိုင်ငံရေးမှာ လူထုပါဝင်ပတ်သက်ခွင့်ဆိုတဲ့ ဥစ္စာပေါ့ဗျာ။ ပြောကြကြေးဆိုလို့ ရှိရင် ဒီစစ်အစိုးရလက်ထက်မှာ ဘယ်လောက်ထိ လူထုပါဝင်ပတ်သက်ခွင့်ရှိလို့လဲ၊ နောက်ပြီးတော့ လူထုကနေပြီးတော့ သူတို့လိုလားတဲ့ ဒီမိုကရေစီစနစ်ကို တည်ထောင်တဲ့နေရာမှာ လူထုပါဝင်ပတ်သက်လာအောင်လို့ ခင်ဗျားတို့ အဖွဲ့ကရော ဘယ်လောက်လုပ်ပေးနိုင်သလဲ။
ဖြေ။ ။ ကျနော်တို့ ပြီးခဲ့တဲ့လှုပ်ရှားမှုတွေရှိပါတယ်၊ ကျနော်တို့ရဲ့ ကန်ပိန်းတွေပေါ့။ ဆစ်ကနေချာ ကန်ပိန်း ကစပြီးတော့ အဖြူရောင် ကန်ပိန်း၊ ပြီးတော့ အိုးပင်းဟတ်လက်တာကန်ပိန်း၊ အခု အဖြူရောင် တနင်္ဂနွေ ကန်ပိန်း အသီးသီးကိုကြည့် လိုက်ပါ။ ကျနော်တို့ဟာ ပြည်သူလူထုပါဝင်လာနိုင်မယ့် နည်းလမ်းကို ကျနော်တို့က ရွေးတယ်။
ပြည်သူလူထုက နှစ်ပေါင်းများစွာကြီး အပစ်ခံ၊ အချိုးခံထားရတဲ့ အခါကျတော့ ခေါက်ရိုးကျိုးနေတဲ့ သဘောကတော့ရှိတယ်။ ဒါ ကျနော်တို့ ပြန်မထွက်လာခင်အထိ။ ကျနော်တို့ ထွက်လာကြပြီးတော့ အတူတကွ ရပ်တည်ကြပြီးတော့ ကျနော်တို့စပြီး အလုပ်လုပ်ကြပြီဆိုတဲ့အခါမှာ ပြည်သူဟာ ဘယ်လမ်းနဲ့ ဘယ်ပုံနဲ့စပြီးတော့ လိုက်နိုင်မလဲဆိုတာကို ကျနော်တို့ စနစ်တကျ ရွေးချယ်တယ်။
အဲဒီအခါကျတော့ ခေါက်ရိုးကျိုးထားပြီးသားဖြစ်တဲ့ ဒီ ချုံးချုံးကျထားတဲ့ ပြည်သူတွေရဲ့အခြေအနေကို ကျနော်တို့က ပြန်ပြီးတော့ အင်အားသွင်းရတယ်။ တဖြည်းဖြည်းနဲ့ ထထိုင်လာနိုင်အောင်၊ ထိုင်ရာကနေ မတ်တပ်ရပ်နိုင်အောင်၊ ပြီးရင် ဖြည်းဖြည်းတွဲပြီးတော့ လျှောက်နိုင်အောင်ပေါ့။
အဲဒီလိုရွေးကြတယ်ဆိုတဲ့နေရာမှာ ကျနော်တို့ အကြမ်းမဖက်တဲ့နည်းကိုပဲ ကျနော်တို့ သုံးရသေးတယ်။ ဆိုတော့ ဒီနှစ်ခုကြားထဲမှာ ကျနော်တို့လှုပ်ရှားရတာ အင်မတန်ခက်ခဲပါတယ်။
ဘာဖြစ်လို့လဲဆိုတော့ တဘက်က အဆင့်ဆင့်သော အာဏာပိုင်တွေက စိတ်မထင်ရင် မထင်သလို အပေါ်တမျိုး အောက် တမျိုးတွေနဲ့ ကျနော်တို့ ကြုံရတယ်။ ဟိုတနယ်မှာ တနည်း၊ ဒီဘက်နယ်မှာ တဖုံဆိုတာ ကျနော်တို့ ကြုံရတယ်။ ဆိုတဲအခါ ကျတော့ ပြည်သူလူထုလိုက်ပါလာနိုင်တဲ့နည်းကို ကျနော်တို့ရွေးတဲ့နေရာမှာ ကျနော်တို့ဟာ ကိုယ်ကိုယ်နှိုက်ကတော့ စိတ်ရောကိုယ်ပါ ပေးဆပ်နိုင်မှုအားလုံး ရယ်ဒီဖြစ်ရင် ဖြစ်မှာပေါ့။ ဒါပေမယ့် ပြည်သူ့ဘက်က လိုက်နိုင်မှုဆိုတာရော ရှိသေးတာကိုး။
အဲဒါကြောင့် ကျနော်တို့က ကျနော်တို့ရှေ့တလှမ်းလေး ဦးဆောင်လိုက်၊ ပြည်သူလူထုလိုက်နိုင်တဲ့အခါကျရင် နောက် တလှမ်းကိုတက်လိုက်၊ ဒီနည်းကိုပဲ သွားရမှာ။ နောက်လာမယ့် ကျနော်တို့ရဲ့ ကန်ပိန်းတွေမှာလည်း ဒီထက်ပိုပြီးတော့ ကျယ်ပြန့်ရမယ်၊ ထိရောက်မှုရှိရမယ်၊ ပြည်သူတွေရဲ့ တကယ့်သဘောထားအစစ်အမှန်ကို ထင်ဟပ်နိုင်တာမျိုးကို နည်းမျိုး စုံနဲ့ ကျနော်တို့သုံးမယ်။ တကယ့် အရေးကြီးတဲ့ သမိုင်းအချိုးအကွေ့မှာ ပြည်သူလူထုရဲ့ ပူးပေါင်းမှုဟာ အင်မတန် လိုအပ်တာမို့ လိုအပ်သလို ထုတ်ပြီးတော့ သုံးနိုင်တဲ့အနေအထားရောက်တဲ့ အထိ ကျနော်တို့ စနစ်တကျ အလုပ်လုပ် သွားမှာဖြစ်တယ်။
မေး။ ။ နောက်ဆုံးအနေနဲ့ ဒေသတွင်းနိုင်ငံ အစိုးရတွေနေနဲ့ ဒီမိုကရေစီရေးကို မထောက်ခံဘဲနဲ့ စစ်အစိုးရနဲ့ပေါင်းပြီး စီးပွားဖြစ်ဖို့ အဓိကဆိုတဲ့ ပေါ်လစီပေါ်မှာရော ဘယ်လိုမြင်လဲဗျ။
ဖြေ။ ။ ဘယ်နိုင်ငံပဲဖြစ်ဖြစ်၊ ဘယ်အဖွဲ့အစည်းပဲဖြစ်ဖြစ် ဂုဏ်သိက္ခာဆိုတဲ့ ကိုယ်ကျင့်တရားနဲ့ နောက်တခုက ကိုယ်ကျိုး စီးပွားဆိုတာ အမြဲတမ်းရှိကြပါတယ်။ ဆိုတော့ လူပဲဖြစ်ဖြစ်၊ နိုင်ငံပဲဖြစ်ဖြစ် ကိုယ်ကျိုးစီးပွားပေါ်တော့ အခြေခံကြတယ်။ ဒါပေမယ့် ဂုဏ်သိက္ခာမဲ့၊ ကျင့်ဝတ်မဲ့တဲ့ အကျိုးစီးပွားသက်သက်တော့ မဖြစ်သင့်ဘူး။ အဲဒီတော့ ဂုဏ်သိက္ခာလည်း ရှိတယ်၊ အကျိုးစီးပွားလည်း မှန်မှန်ကန်ကန်ပါမယ်ဆိုတဲ့ နှစ်ဘက်လွှဖြစ်တဲ့ ကြိုးပမ်းမှုမျိုးကို စဉ်းစားဖို့သင့်ပါတယ်။
အစိုးရတွေဟာ ပြည်သူလူထုတွေရဲ့ ရွေးချယ်တင်မြှောက်ထားတဲ့ အစိုးရမဟုတ်ရင်တော့ ဆိုးတာပေါ့ဗျ။ သူတို့နည်း သူတို့ဟန်နဲ့ အင်အားတွေနဲ့ အာဏာယူထားကြတဲ့ အစိုးရ အစိုးရချင်း ဆက်ဆံရေးဆိုတာ တကယ်တော့ ကျဉ်းမြောင်း လွန်းပါတယ်ဗျ။ တကယ့်တကယ်က နိုင်ငံသားအချင်းချင်း ဆက်ဆံရေးသာလျှင် ရေရှည် အကျိုးစီးပွားဖြစ်မယ်လို့ ကျနော် ယုံကြည်တယ်။ အဲဒီတော့ ကျင့်ဝတ်ဂုဏ်သိက္ခာအရကော ကောင်းမွန်တဲ့ ဆက်ဆံရေးမျိုး၊ နိုင်ငံတခုစီရဲ့ အကျိုးစီးပွား တွေရောရှိတဲ့ ဆက်ဆံရေးမျိုးကို ကျနော်တို့က ကြိုဆိုပါတယ်။ အဲဒီလိုပဲ ဖြစ်စေချင်တယ်။
ကျနော်တို့ တိုင်းပြည်ရဲ့ ပြဿနာကို ဖြေရှင်းကြတဲ့နေရာမှာ ကျနော်တို့တိုင်းပြည်မှာ တကယ်ပြဿနာတွေ ရှိနေတယ် ဆိုတာကို လုံခြုံရေးကောင်စီမှာ ဗီတိုအာဏာနဲ့ ပယ်ချခဲ့တဲ့ နိုင်ငံကြီးတွေကတောင် ၀န်ခံထားရတယ်။ ကောင်းပြီ၊ ဒီတော့ ကျနော်တို့ရဲ့ ပြဿနာကို ဘယ်လိုဖြေရှင်းမလဲဆိုတဲ့နေရာမှာ အငြင်းပွားမှုတွေကိုဖယ်ပြီးတော့ အားလုံးကို ဘုံလုပ်လို့ရတဲ့ လုပ်ငန်းစဉ်တခုကို ရှာလို့ရပါတယ်။အဲဒါက ဘာလဲဆိုတော့ ကျနော်တို့ တိုင်းပြည်မှာ လတ်တလော စိတ်ကြိုက်ခြယ်လှယ်နေတဲ့ အင်အားရှိတဲ့လူက စိတ်ကြိုက် လုပ်စတမ်းဆိုတဲ့ ရလဒ်မျိုးကို လက်မခံဘူး။ အများရဲ့ သဘောတူညီမှုကို ယူပါဆိုတဲ့ အချက်မျိုးဟာ ဘုံသဘောတူညီချက်၊ ဘုံလုပ်ငန်းစဉ်အနေနဲ့ ပူးပေါင်းပြီးတော့ လုပ်လို့ရတယ်။ အဲဒီတော့ တကယ်တမ်း မှန်မှန်ကန်ကန် စေတနာရှိတယ်ဆိုရင် ကျနော်တို့နိုင်ငံသားတွေရဲ့ အကျိုးစီးပွားမျက်နှာကိုလည်း ကြည့်ပါ။
အစိုးရ အစိုးရချင်း ပြေလည်ရေးဆိုတာက ယာယီပဲ ဖြစ်ပြီးတော့ သမိုင်းမှာ အားနည်းပါတယ်။ အဲဒီလို အားနည်းမှုတွေ ဖြစ်သွားနိုင်တယ်ဆိုတာ ကျနော်ကြိုပြီးတော့ ပြောထားချင်တယ်။ ။
No comments:
Post a Comment