ဧရာဝတီ စက်တင်ဘာ ၄၊ ၂၀၀၇
ရွှေတိဂုံစေတီ-ရန်ကုန်
နေ့လယ်တနာရီတွင် ဒေါ်နော်အုန်းလှဦးဆောင်သည့် အင်္ဂါနေ့ဝတ်ပြုဆုတောင်းအဖွဲ့က ဒေါ်အောင်ဆန်းစုကြည်နှင့် နိုင်ငံရေးအကျဉ်းသားများ လွတ်မြောက်ရေးအတွက် ရွှေတိဂုံစေတီ အင်္ဂါထောင့်၌ ၀တ်ပြုဆုတောင်းခဲ့ကြသည်။
ဆုတောင်းပွဲ၌ ၀တ်ပြုဆုတောင်းသူ ၁၀ ဦးခန့်ပါဝင်ပြီး ၎င်းတို့အနက် ဒေါ်မြမြစန်းအား ဘုရားဂေါပကအဖွဲ့က ကျိုက္ကဆံ စစ်ကြောရေးစခန်းသို့ ဖမ်းဆီးပို့ဆောင်လိုက်ကြောင်း စုံစမ်းသိရှိရသည်။
တောင်ကုတ်-ရခိုင်ပြည်နယ်
တောင်ကုတ်မြို့တွင် လောင်စာဆီနှင့် ကုန်ဈေးနှုန်းကျဆင်းရေးအတွက် ဆန္ဒပြ မှုကြောင့် အဖမ်းခံထားရသူ နှစ်ဦးနှင့် ပတ်သက်ပြီး တောင်ကုတ် အန်အယ်လ်ဒီ စည်းရုံးရေးအဖွဲ့၏ အတွင်းရေးမှူး ဦးခင်လတ်ဦးဆောင်သည့် ပါတီဝင် ၁၅ ဦးက ရဲစခန်းသို့ ယနေ့နံနက်ပိုင်းက သွားရောက်ဆွေးနွေးရာ ၎င်းတို့သွားရာနောက်သို့ ပြည်သူထူထု တထောင်ကျော်က လိုက်လံအားပေးကြကြောင်း သိရသည်။
“ဆန္ဒပြသူတွေကို ရဲကဖမ်းထားတာ ၄၊ ၅ ရက်ရှိသွားပြီ။ ဘယ်ရောက်နေမှန်းမသိဘူး၊ ဘာအမှုနဲ့ တရားစွဲမှန်းလည်းမသိဘူး။ အဲဒီလိုမသိရတဲ့အတွက်၊ ကျနော်တို့တောင်းဆိုထားတာတွေကို ဘာမှအရေးယူ ဆောင်ရွက်ပေးခြင်းမရှိတဲ့အတွက်
တာဝန်ရှိတဲ့ မြို့နယ်ရဲမှူးကို တွေ့ဖို့သွားတာပါ” ဟု ဦးခင်လတ်က ပြောသည်။
သြဂုတ်လ ၃၁ ရက်နေ့တွင် လောင်စာဆီနှင့် ကုန်ဈေးနှုန်းကျဆင်းရေးအတွက် တောင်ကုတ်တွင်ဆန္ဒပြခဲ့သူ ၂ နှစ်ဦးကို ရဲကဖမ်းဆီးခဲ့သည်။
အဆိုပါ ဆန္ဒပြသမားနှစ်ဦး အဖမ်းခံရသည့်အတွက် ယခုလ ၂ရက်နေ့တွင် တောင်ကုတ် အန်အယ်လ်ဒီ စည်းရုံးရေးအဖွဲ့
ဝင်များက အရေးပေါ်အစည်းအဝေးကျင်းပ၍ ဆုံးဖြတ်ချက် ၃ ချက်ကိုချမှတ်ခဲ့ကြသည်။ ဒေသအာဏာပိုင်တို့ကိုလည်း အဆိုပါဆုံးဖြတ်ချက်များကို အသိပေးအကြောင်းကြားကြောင်း သိရသည်။
ထိုဆုံးဖြတ်ချက်များမှာ ဥပဒေချိုးဖောက်ခြင်းမရှိဘဲ မိမိဆန္ဒအားထုတ်ဖော်ပြသသူများကို ၂၄ နာရီကျော်ကြာအောင် ချုပ်နှောင်ထားသည်ကို ကန့်ကွက်ကြောင်း၊ ဆန္ဒပြသမားနှစ်ဦးကို ဖမ်းဆီးစဉ်က အဓမ္မ၀င်ရောက်ထိုးကြိတ်ခဲ့သည့် စစ်သားအား အရေးယူပေးရန်နှင့် ၎င်းတို့နှစ်ဦးအား ဆက်လက် ဖမ်းဆီးထားပါက ပိုမိုထိရောက်သည့် ဖိအားပေး တောင်းဆိုမှုများကို ဆက်လက်လုပ်ဆောင်ရန်တို့ ဖြစ်သည်။
ဦးခင်လတ်နှင့်အဖွဲ့သည် အဖမ်းခံရသူများ၏ မိသားစုဝင်များနှင့်သွားရာ အားပေးသူ တထောင်ကျော်က ဆက်လက်လိုက်ပါ အားပေးနေသဖြင့် အာဏာပိုင်တို့က ဆက်မလိုက်ရန်အတွက် သေနတ်ပြခြိမ်းခြောက် လူစုခွဲခဲ့ကြောင်း စုံစမ်းသိရှိရသည်။
( http://www.irrawaddy.org/bur/protest/BurmaProtests-Continue.html ကနေ ယူတယ်။)
No comments:
Post a Comment