လမ်းလျှောက်ဆန္ဒပြပွဲ ဒိုင်ယာရီ
ဧရာဝတီ စက်တင်ဘာ ၇၊ ၂၀၀၇
ပခုက္ကူလုံခြုံရေး-မကွေးတိုင်း
ပခုက္ကူ မြို့ထဲတွင် ယနေ့ညနေပိုင်း မှ စတင်၍ စစ်တပ်က စစ်ကားများဖြင့် လုံခြုံရေးယူထားကြောင်း သိရသည်။
ညနေ ၃ နာရီ ခန့်က မဟာဝိဇယာရာမ စာသင်ကျောင်းတိုက် (အရှေ့တိုက်) အနီးတွင် လက်နက်ကိုင်ဆောင်ထားသော စစ်သား ၁၅ ဦးခန့် တင်ဆောင်ထားသည့် စစ်ကားတစီးနှင့် ပခုက္ကူမြို့ လျှပ်စစ်ရုံးဝင်းအတွင်း၌လည်း အလားတူ စစ်ကားတစီးချထားပြီး စစ်တပ်က လုံခြုံရေးယူထားသည်ဟု မြို့ခံများက ပြောသည်။ အဆိုပါ စစ်ကားများတွင် အသံချဲ့ စက်များ တပ်ဆင်ထားသည်ဟု ဆိုသည်။
ပခုက္ကူမြို့တွင် မကွေးတိုင်းမှူး၊ အနောက်မြောက်ပိုင်း တိုင်းမှူး စသည့် စစ်တပ် ထိပ်ပိုင်း ခေါင်းဆောင် တချို့ ရောက်ရှိနေ သည်ဟုလည်း သိရသည်။
ဂွမြို့-ရခိုင်ပြည်နယ်
ယနေ့ နေ့လယ်ပိုင်းက ရခိုင်ပြည်နယ် ဂွမြို့တွင် လောင်စာဆီနှင့် ကုန်ဈေးနှုန်းကျဆင်းရေးအတွက် လူ ၄ ဦး က မြို့ သို့ ပတ်၍ လမ်းလျှောက် ဆန္ဒပြကြောင်း သိရသည်။
နေ့လယ် ၁၂ နာရီခန့်က ဂွမြို့ အန်အယ်လ်ဒီ ဥက္ကဌ ဦးစိန်ကြယ်၊ ဂွမြို့လွှတ်တော်အမတ် ဦးညီပုနှင့် စည်းရုံးရေး အဖွဲ့ဝင် ၂ ဦး တို့က ဆန္ဒပြ လမ်းလျှောက်ကာ မြို့တွင်းရှိ ဘုရားများ၊ ဘုန်းကြီးကျောင်းများသို့လည်း သွားရောက် ဦးတိုက် ဆုတောင်းပြီး နောက် လောင်စာဆီနှင့် ကုန်ဈေးနှုန်းကျဆင်းရေးအတွက် အကြံပြုစာ တစောင်ကို မြို့နယ် တရားရုံးသို့ ပို့ဆောင်ခဲ့သည်ဟု ဦးစိန်ကြယ် က ဧရာဝတီသို့ပြောပြသည်။
သုံးခွ-ရန်ကုန်တိုင်း
ရန်ကုန်တိုင်း သုံးခွမြို့က အန်အယ်လ်ဒီ ဥက္ကဌ ဦးအေးမြင့်၊ ဒု ဥက္ကဌ ဦးလှစိုးတို့အပါအ၀င် အဖွဲ့ဝင် ၇ ဦးကို အာဏာပိုင် များက ဆန္ဒပြမည်ဟူသော သတင်းအရ ယမန်နေ့ညတွင် ဖမ်းဆီးခဲ့ကြောင်းဒေသခံများက ပြောသည်။
ပခုက္ကူ-မကွေးတိုင်း
ပခုက္ကူမြို့၌ မကြာသေးခင်က ဆန္ဒပြ သံဃာများတော်များကို အကြမ်းဖက် နှိမ်နင်းရာတွင် ဦးဆောင်ပါဝင်သူများ ဖြစ်သည့် ယရက ဥက္ကဌ ဟောင်း၏ တပည့်နှင့် ကြံ့ဖွံ့ အတွင်းရေးမှူးတို့ကို သံဃာတော်များက လိုက်လံရှာဖွေနေရာ တိမ်းရှောင် နေသောကြောင့် ၎င်းတို့ပိုင် ပစ္စည်းတချို့ကို ဖျက်ဆီးလိုက်ကြောင်း ဒေသခံများက ပြောသည်။
စက်တင်ဘာ ၅ ရက်နေ့က ငြိမ်းချမ်းစွာ လမ်းလျှောက် ဆန္ဒပြသော သံဃာများကို အကြမ်းဖက်ခဲ့သူ ယရက ဥက္ကဌဟောင်း ဦးဝင်းမြင့်၏ တပည့် မြို့ခံများက“လူမိုက်၊ လူရမ်းကား” ဟုခေါ်ဆိုသော ကိုခင်မောင်ဝင်းကို ရှာဖွေရာ မတွေ့သော ကြောင့် သံဃာများက ၎င်း၏ တဲအိမ်ကို ဖြိုဖျက်လိုက်ကြောင်း၊ ကြံ့ဖွံ့အတွင်းရေးမှူး ဦးလှဝင်းနိုင် ပိုင်ဆိုင်သည့် လက်ကိုင်ဖုန်း ဆက်စပ်ပစ္စည်းများ၊ အီလက်ထရွန်းနစ်ပစ္စည်းများ ရောင်းသည့်ဆိုင်ကိုလည်း ဖြိုဖျက်လိုက်ကြောင်း မြို့ခံတဦးကပြောသည်။
ယနေ့ထုတ် စစ်အစိုးရသတင်းစာများတွင် သက်ဆိုင်ရာ တာဝန်ရှိသူများနှင့် မြို့နယ်သံဃ နာယက ဥက္ကဌ ဆရာတော် ဦးတေဇောဘာသ တို့က မေတ္တာရပ်ခံတားမြစ်သည့်ကြားမှပင် ဆန္ဒပြသံဃာများက ဥက္ကဌ ဆရာတော်အား တွန်းလှဲ ဖြတ်ကျော် ဆန္ဒပြခဲ့သည့်အတွက် လုံခြုံရေးအရ သေနတ်ဖောက် ခြောက်လှန့် လူစုခွဲခဲ့ရခြင်းဖြစ်သည်ဟု စွပ်စွဲ ရေးသား ထားသည်။
ထို့ပြင် သတင်းစာ၌ ၁၉၈၈ ခုနှစ် အရေးအခင်းကဲ့သို့ ဖြစ်ပေါ်လာရန် ဖန်တီးမှုများကို လုံးဝလက်ခံမည်မဟုတ်ကြောင်း၊ ယင်းဖန်တီးမှုမျိုးပြုလုပ်ပါက ကာကွယ် တားဆီးသွားမည်ဖြစ်ကြောင်းလည်း ဖော်ပြထားသည်။
( http://www.irrawaddy.org/bur/protest/BurmaProtests-Continue.html ကနေ ယူတယ်။)
No comments:
Post a Comment