(ဘလော့ဂါမှတ်ချက် - ဒီတခေါက် ထွေရာလေးပါးမှာ အချက်အလက် အယူအဆတွေ ချပြထားတယ်။ အသောအထေ့လုပ်ဖို့ မေ့သွားပြီထင်ပါရဲ့။ အင်း - - တခါတလေတော့လည်း ရန်ကုန်သားတာတေတို့က ခပ်တည်တည်ပေါ့ဗျာ။)
ချင်းမိုင်ရုက္ခစိုးနှင့် ထွေရာလေးပါး (အပိုင်း - ၁၈၂)
ရန်ကုန်သားတာတေ သြဂုတ် ၈၊ ၂၀၀၇
ငါ့ကို အီးမေးလ်နဲ့
ပို့လိုက်တာ….မင်း မသိသေးဘူးလား… (ရုက္ခစိုး၏ အပြောက သူ အင်တာနက် အီးမေးလ်
ကျယ်ကျယ်ပြန့်သုံးနေသည်ကို သိသာစေချင်သည့် သဘောလည်း ပါသည်)
ယနေ့သည် မြန်မာ့သမိုင်းဝင် ရှစ်လေးလုံး အရေးတော်ပုံကြီး၏ ၁၉ နှစ်မြောက် နှစ်ပတ်လည်နေ့ဖြစ်သည့်အား လျော်စွာ မြန်မာပြည်တွင်းနှင့် ကမ္ဘာတ၀န်းတွင်ရောက်ရှိနေသော ဒီမိုကရေစီလိုလားသည့် မြန်မာနိုင်ငံသားများက အထိမ်းအမှတ် လှုပ်ရှားမှုများပြုလုပ်နေကြသည်။
ထိုင်းနိုင်ငံတွင် ရောက်ရှိနေကြသည့် မြန်မာနိုင်ငံသားများကလည်း ရှစ်လေးလုံးအထိမ်းအမှတ်ပွဲ တချို့ပြုလုပ်နေ ကြရာ ကြွက်စုတ်တယောက်မှာလည်း တက်ကြွနေသည်။
ယခုလည်း ဖိုးရှုပ်ကိုပင် မစောင့်တော့ဘဲ ရုက္ခစိုးရှိရာ ဒွိုင်ဆူထေ့ တောင်ပေါ်သို့ ကြွက်စုတ်တဦးတည်း တက်လာ ခဲ့သည်။
ကြွက်စုတ်က တောင်ပေါ်သို့အရောက် ညောင်ရိပ်ကို လှမ်းကြည့်လိုက်ရာ စာတစောင်ကို စူးစိုက်စွာ ဖတ်ရှု နေသည့် ရုက္ခစိုးကို မြင်ရသည်။
ကြွက်စုတ်။ ။ ဗျိုး…ဦးရုက္ခစိုး…ဘာစာတွေများ သဲကြီးမဲကြီး ဖတ်နေရတာလည်းဗျ…ကျနော်လာတောင်မမြင်ဘူး…
ရုက္ခစိုးက ကြွက်စုတ်ကို လှမ်းကြည့်လိုက်ပြီး လက်ယပ်ခေါ်လိုက်သည်။
ရုက္ခစိုး။ ။ အတော်ပဲ…လာဟေ့…ငါလည်း မင်းတို့ကို မျှော်နေတာ…ဖိုးရှုပ်တယောက်ရောကွ…
ကြွက်စုတ်။ ။ ကျနော် သူ့ကို မစောင့်ဘဲ တယောက်တည်းလာခဲ့တာ…ချိန်းထားတာထက် ၁၅ မိနစ်လောက် နောက်ကျပြီးမှ ဖုန်းခေါ်လာတယ်လေ…သူ သတင်းတခုအတွက် အင်တာဗျူးလုပ်နေလို့ ဆိုလား…ဒါနဲ့ ဦးရုက္ခစိုး က ကျနော်မေးတာလည်း မဖြေဘူး…အဲဒါ ဘာစာလဲ ခင်ဗျ…
ကြွက်စုတ် ပြောလိုက်တော့မှ ရုက္ခစိုး သတိရသွားသည်။
ရုက္ခစိုး။ ။ အေး…ဟုတ်သားပဲ…မေ့တော့မလို့…ဒီစာက တခြားမဟုတ်ဘူးမောင်… ၈၈ ကျောင်းသားအဖွဲ့က ထုတ်တဲ့ ဒီနေ့မှာ ကျရောက်တဲ့ ရှစ်လေးလုံးအရေးတော်ပုံ အထိမ်းအမှတ် ကြေညာချက် ကွ…ငါ့ကို အီးမေးလ်နဲ့ ပို့လိုက်တာ….မင်း မသိသေးဘူးလား…
(ရုက္ခစိုး၏ အပြောက သူ အင်တာနက် အီးမေးလ် ကျယ်ကျယ်ပြန့်သုံးနေသည်ကို သိသာစေချင်သည့် သဘောလည်း ပါသည်)
ကြွက်စုတ်။ ။ ဟုတ်ကဲ့…ရေဒီယိုမှာတော့ နည်းနည်းကြားလိုက်တယ်…ကျနော် အသေအချာမသိသေးဘူး ခင်ဗျ… ပြောပြပါဦး…
ရုက္ခစိုး။ ။ ထူးခြားတာကတော့…ဒီစတိတ်မင့်မှာ…ရှစ်လေးလုံး အရေးတော်ပုံကြီးဖြစ်ရတာ ၁၉၇၄ ဖွဲ့စည်းပုံ အခြေခံ ဥပဒေရဲ့ချို့ယွင်းချက်ကြောင့် ဖြစ်တယ်တဲ့ကွ…ဆိုလာတာက အဲဒီအခြေခံ ဥပဒေကိုက ပြည်သူ့ကိုယ်စား လှယ် အစစ်တွေရေးဆွဲတာ မဟုတ်တဲ့ ဥပဒေဖြစ်နေလို့ပဲတဲ့…
ကြွက်စုတ်။ ။ ဒါဆို အခုလည်း နအဖ ကျင်းပတဲ့ အမျိုးသားညီလာခံက တိုင်းပြည်ရဲ့လိုအပ်ချက်အတွက်ဆိုပြီး အခြေခံ ဥပဒေသစ်တခုကို ကပြေးဒုန်းတိုက်ရေးဆွဲနေတယ်လေ…အဲဒီမှာလည်း ပြည်သူ့ ကိုယ်စားလှယ်ဆိုတာ မပါသလောက်ဘဲ မဟုတ်လားဗျာ…
ရုက္ခစိုးက ကြွက်စုတ်၏ အလေးအနက်ပြောလိုက်ပုံကို ပြုံးကြည့်လိုက်ပြီး ပြန်ပြောသည်။
ရုက္ခစိုး။ ။ အဲဒါ ကိုလည်း ဒီ ၈၈ ကြေညာချက်ထဲမှာ ထည့်သတိပေးထားတယ်မောင်…
ထိုအချိန်တွင် ရုတ်တရက် ဖိုးရှုပ်ရောက်လာပြီး ၀င်ပြောလိုက်သည်။
ဖိုးရှုပ်။ ။ ဘာတွေ သတိပေးထားတာတဲ့လည်း ဦးရုက္ခစိုးရဲ့…
ဖိုးရှုပ် ၀င်ပြောလိုက်၍ ရုက္ခစိုးစကား ခဏရပ်သွားခိုက် ကြွက်စုတ်က ထ ပြောလိုက်သည်။
ကြွက်စုတ်။ ။ ဟာ သတင်းထောက်ချုပ်မှူးကြီးရောက်လာပလား…ကြာလှချည်လား ဘာတွေများဗျူးနေတာလဲ…
ဖိုးရှုပ်။ ။ ဗျူးတာကို နောက်မှပြောမယ်…ခုန ဦးရုက္ခစိုး စကားကို ဆက်ပါဦး…ဘာတဲ့ သတိပေးတယ်ဆိုလား…
ရုက္ခစိုး။ ။ အေး ဟုတ်တယ်…ငါ နားလည်သလို ပြောရရင်တော့…အဲဒီ ၈၈ ကျောင်းသား အဖွဲ့ရဲ့ ကြေညာချက် ထဲမှာ… နအဖ အခုရေးဆွဲနေတဲ့ ဖွဲ့စည်းပုံ အခြေခံဥပဒေဟာလည်း တဲ့ ဒီမိုကရေစီနဲ့ မြန်မာပြည်သူတွေအတွက် အာမခံချက် မရှိရင်…ပြီးခဲ့တဲ့ ၈ လေးလုံး အရေးတော်ပုံကြီးနဲ့ အလားသဏ္ဍန်တူတဲ့ နောက်ထပ် အရေးခင်းတခု ပြန်လည် ဖြစ်ပေါ်လာနိုင်တယ်လို့ သတိပေးထားတာကွ…
ကြွက်စုတ်။ ။ ကျနော်ကတော့… အဲဒီ အခြေခံဥပဒေတွေ ဘာတွေကို အသေအချာတော့ နားမလည်ဘူး… လူထုကို သွေးစွန်းမယ့် ကိစ္စကိုတော့ ဆန့်ကျင်တယ်ဗျာ…
ယနေ့ ကြွက်စုတ်၏ စကားပြောများထူးခြားနေသည်ကို ရုက္ခစိုးက သတိထားမိနေသည်။
ဖိုးရှုပ်။ ။ မင်းပြောတာ ငါ လည်း လက်ခံတယ်…ငါ တို့ တိုင်းပြည်က အစိုးရတွေက လူထုကို မသိကျိုးကျွံပြု အလွဲသုံးစား လုပ်နေတာ နှစ် ၅၀ လောက်တောင်ရှိတော့မယ်…အခုလည်း ငါ ဒီနေ့ အင်တာဗျူးတဲ့အထဲမှာ ဘာပါလဲ သိလား…ပြည်သူ တွေ ဆင်းရဲတွင်း နက်သထက် နက်နေတာပါတယ်…တချို့မြို့နယ်တွေမှာ ပေါင်နှံ စားစရာ ပစ္စည်း မရှိတော့လို့ အမျိုးသား မှတ်ပုံတင်ကိုတောင် နေ့မှာပေါင်သုံး ညနေ အလုပ်က ပိုက်ဆံရမှ ပြန်ရွေး လုပ်နေရတယ်တဲ့…
ရုက္ခစိုး။ ။ ဘယ် နိုင်ငံမှာမှ ငါတော့ မကြားဖူးဘူး…မှတ်ပုံတင်ပေါင်သုံး ရတဲ့အဖြစ်…ကိုယ့်နိုင်ငံအတွင်းမှာ ညကျမှ နိုင်ငံသားအဖြစ်ရသလိုဖြစ်နေတယ်…ဒါ များ ခေတ်မီဖွံ့ဖြိုး တိုးတက် တဲ့ နိုင်ငံတော်သစ်ဆီ ချီတက်နေပါတယ်… တဲ့… သူမတူအောင် စစ်တပ်အစိုးရခေတ်မှာ တိုးတက်နေပါ တယ်တဲ့…
ကြွက်စုတ်။ ။ အဲဒါ အခွင့်ထူးခံတွေနဲ့ ငဖားတွေကလည်း အဲဒီလိုပဲပြောကြတယ်လေ…နအဖ သတင်းစာတွေမှာ ပါနေကြပဲ… ဒီ ပြည်ပ ဒီမိုကရေစီ အင်အားစုတွေထဲမှာတောင် တော်လှန်ရေးကို အရသာရှိနေလို့ တော်လှန်ရေး အဓွန့်ရှည်ပါစေလို့ ဆုတောင်းနေသူတွေ ရှိတယ်ဆိုပြီးဝေဖန်သံတွေလည်း ထွက်နေတယ် မဟုတ်လား…
ဖိုးရှုပ်။ ။ အဲဒီ မြန်မာ့အရေးနဲ့ အရသာတွေ့တဲ့အထဲမှာ ဟို ကုလသမဂ္ဂက ဂန်ဘာရီဆိုတဲ့ လူကြီးလည်း အရသာ တွေ့နေပုံ ရတယ်…အခု ထိုင်းကို ရောက်နေပြန်ပြီတဲ့…ကုလ စရိတ်နဲ့ တွက်ခြေကိုက်နေသလားပဲ…
ရုက္ခစိုး။ ။ အေး…ဂန်ဘာရီပဲဖြစ်ဖြစ်…အခွင့်ထူးခံတွေပဲဖြစ်ဖြစ်…ငဖားတွေပဲ ဖြစ်ဖြစ်…ငကြွက်ပြောသလိုပဲ လူထုကို ဒုက္ခဖြစ်စေမယ့် လူတွေကို ငါ လည်း ဆန့်ကျင်တယ် ဟေ့…
ရုက္ခစိုး ၏ စကားသံကြောင့် ဖိုးရှုပ်ကပါ ကြက်သီး မွေးညင်းများထသွားသကဲ့သို့ စိတ်တက်ကြွလာကာ..
ဖိုးရှုပ်။ ။ ဟုတ်တယ်…အဲဒီလူတွေကို ကျနော်လည်း အပြတ်ဆန့်ကျင်တယ်ဗျာ…ကျရှုံးပါစေ…
ဤတွင် မမျှော်လင့်ဘဲ သုံး ဦးသား အတိုင်အဖောက်ညီသွားကြပြီး ကြွေးကြော်သံများကိုတိုင်လိုက်ကြလေတော့ သည်။
ရုက္ခစိုး + ဖိုးရှုပ် + ကြွက်စုတ် ။ ။ စစ်အာဏာရှင်နဲ့ ငဖားများ… ကျဆုံးပါစေ…ကျဆုံးပါစေ…
စစ်အာဏာရှင်နဲ့ အခွင့်ထူးခံများ…ကျဆုံးပါစေ…ကျဆုံးပါစေ…
ဒီမိုကရေစီ အရေးတော်ပုံ…
အောင်ရမည်…အောင်ရမည်…အောင်ရမည်…
ရှစ်လေးလုံးသတိ…အမြဲရှိ…
…………………………….
…………………………….
No comments:
Post a Comment